თუ თქვენ ფიქრობთ ორსულობის დაგეგმვაზე ან უკვე ცდილობთ დაორსულებას, დროა ყურადღება გაამახვილოთ პრეკონცეპტუალურ ჯანმრთელობაზე.

პრეკონცეპტუალური ჯანმრთელობა გულისხმობს ორსულობის წინ და ორსულობებს შორის დაგეგმილ ექიმთან ვიზიტს, რომლის მთავარი მიზანიც არის ჯანმრთელი ახალშობილის დაბადება. წინამოსამზადებელი პერიოდი ყველა ქალბატონისთვის ინდივიდუალურია და შეიძლება გაგრძელდეს რამდენიმე კვირიდან რამდენიმე თვემდე. მიუხედავად იმისა, ეს თქვენი პირველი ორსულობაა თუ არა, მნიშვნელოვანია შემდეგი ეტაპების გავლა:

დაგეგმეთ ვიზიტი ექიმთან

ექიმი განიხილავს თქვენს სამედიცინო ისტორიას და ისეთ მდგომარეობებს, რომლებმაც შესაძლოა გავლენა მოახდინონ ორსულობასა და ნაყოფის განვითარებაზე. განსაკუთრებულ ყურადღებას იმსახურებს:

• წინა ორსულობებისა და მშობიარობების მიმდინარეობის თავისებურებები და შესაძლო გართულებები;

• მედიკამენტები, რომლებსაც იღებდით ან იღებთ ამჟამად;

• ვაქცინაციის სტატუსი და საჭირო ვაქცინების დროული ჩატარება.

სამედიცინო მდგომარეობები

მნიშვნელოვანია, რომ პაციენტი იყოს ლიცენზირებული მედპერსონალის მეთვალყურეობის ქვეშ ან ნამკურნალები შემდეგი მდგომარეობების შემთხვევაში:

• სქესობრივი გზით გადამდები ინფექციები;

• დიაბეტი;

• ფარისებრი ჯირკვლის დაავადებები;

• არტერიული ჰიპერტენზია და სხვა ქრონიკული პათოლოგიები.

ცხოვრების წესი და მავნე ჩვევები

აუცილებელია ექიმთან განიხილოთ:

• თამბაქოს, ალკოჰოლის, მარიხუანას ან სხვა მავნე ნივთიერებების მოხმარება;

• სხვადასხვა სახის მედიკამენტების მიღება;

• სტრესული გარემო;

• ტოქსიურ ნივთიერებებთან კონტაქტი.

ექიმი დაგეხმარებათ პრობლემების მოგვარებაში და გირჩევთ შესაბამის ფსიქო–სოციალურ და სამედიცინო სერვისებს.

მედიკამენტები

ორსულობამდე ან ორსულობის დროს ზოგიერთი მედიკამენტის მიღებამ შეიძლება ნაყოფის განვითარების ანომალიები გამოიწვიოს. თუ გეგმავთ ორსულობას, აუცილებლად განიხილეთ ექიმთან ეს საკითხი.
განსაკუთრებით მნიშვნელოვანია იმ პაციენტებისთვის, რომლებიც იღებენ ოპიოიდური ჯგუფის მედიკამენტებს — საჭიროა რისკების შეფასება და ჯანსაღი ორსულობისთვის წინაპირობების შექმნა.

ვაქცინაცია

ორსულობამდე, ორსულობის დროს ან მშობიარობის შემდგომ რეკომენდებულია კონკრეტული ვაქცინების ჩატარება, რათა დედისა და ახალშობილის ჯანმრთელობა მაქსიმალურად იყოს დაცული.
აუცილებლად განიხილეთ ვაქცინაციის საკითხი ექიმთან და საჭიროების შემთხვევაში დროულად დაგეგმეთ მათი ჩატარება.

ფოლიუმის მჟავა

მიიღეთ 400 მკგ ფოლიუმის მჟავა ყოველდღიურად.
ეს არის B ჯგუფის ვიტამინი, რომელიც ხელს უშლის ნერვული მილის განვითარების დეფექტებს. რეკომენდებულია ფოლიუმის მჟავის მიღების დაწყება ორსულობის დაგეგმვამდე 1 თვით ადრე.

მავნე ნივთიერებების შეწყვეტა

შეწყვიტეთ ალკოჰოლის, თამბაქოსა და სხვა მავნე ნივთიერებების მოხმარება.
ისინი ზრდის ნაადრევი მშობიარობისა და ნაყოფის უეცარი სიკვდილის სინდრომის რისკს. საჭიროების შემთხვევაში მიმართეთ ექიმს დახმარებისთვის.

ტოქსიკური გარემოს თავიდან აცილება

ტოქსიკური ქიმიური ნივთიერებები (მძიმე მეტალები, ქიმიური შენაერთები, სასუქები, მწერებისა და მღრღნელების საწინააღმდეგო საშუალებები) უარყოფით გავლენას ახდენს რეპროდუქციულ სისტემებზე და ორსულობის მიმდინარეობაზე.

ჯანსაღი წონის შენარჩუნება

ჭარბი წონა და სიმსუქნე შეიძლება გახდეს როგორც უნაყოფობის, ისე გულ–სისხლძარღვთა დაავადებების, ტიპი 2 შაქრიანი დიაბეტის და ონკოლოგიური დაავადებების რისკ–ფაქტორი.
ასევე, ორსულობის შემთხვევაში, ჭარბი წონა ზრდის სამეანო გართულებების ალბათობას.
წონის დეფიციტიც რისკ–ფაქტორია.
ჯანსაღი წონის შესანარჩუნებლად რეკომენდებულია სწორი კვება და რეგულარული ფიზიკური აქტივობა.

ოჯახური ანამნეზი

ოჯახური ანამნეზი მნიშვნელოვან როლს ასრულებს დედისა და ბავშვის ჯანმრთელობაში. თუ ოჯახში სხვადასხვა დაავადება დაფიქსირებულია, ექიმთან აუცილებლად განიხილეთ ეს საკითხი. შესაძლოა საჭირო გახდეს გენეტიკოსის კონსულტაცია და შესაბამისი კვლევები.

ფსიქოლოგიური მომზადება

ორსულობისთვის მზადება მოიცავს ფსიქოლოგიურ მხარესაც. საჭიროების შემთხვევაში მიმართეთ სპეციალისტს კონსულტაციისთვის.

ჟორდანიას კლინიკა გთავაზობთ ყველა ზემოთჩამოთვლილ სერვისს ერთ სივრცეში და გისურვებთ ჯანმრთელ და მშვიდ ორსულობას!