ძუძუს კიბო მსოფლიოს მასშტაბით ერთ-ერთი ყველაზე გავრცელებული ავთვისებიანი სიმსივნეა ქალებში. ადრეული დიაგნოსტიკა კი სიცოცხლის გადარჩენის ერთ-ერთ მნიშვნელოვან ფაქტორს წარმოადგენს. სწორედ ამიტომ, აუცილებელია თითოეულმა ქალმა იცოდეს ძირითადი სიმპტომები, თვითგასინჯვის ტექნიკა და დროულად მიმართოს ექიმს საეჭვო ცვლილებების აღმოჩენის შემთხვევაში.

ძუძუს კიბოს სიმპტომები: რას უნდა მიაქციოს ყურადღება ქალმა

პათოლოგიური ცვლილებები სარძევე ჯირკვლებში ხშირად უპირველესად გამოვლინდება შემდეგი სიმპტომებით:

• წარმონაქმნი ძუძუს არეში (განსაზღვრული კვანძი)

• დვრილის ჩაბრუნება

• დვრილიდან გამონადენი (განსაკუთრებით სისხლიანი ან გამჭვირვალე)

• ძუძუს კანის ფერისა და ტექსტურის ცვლილება („ფორთოხლის კანის ეფექტი“)

• ძუძუს ან მის მიდამოში სიწითლე, შეშუპება ან დაწყლულება

• სარძევე ჯირკვლის ზომისა და ფორმის ცვლილება

• შეხებით მტკივნეული ან უმტკივნეულო წარმონაქმნი იღლიის ან ლავიწზედა ფოსოში

ამ სიმპტომების აღმოჩენის შემთხვევაში აუცილებელია დაუყოვნებლივ მიმართოთ სპეციალისტს.

ვიზუალური დათვალიერება და თვითგასინჯვა

თვითგასინჯვა არის პრევენციული თვითმოვლის ერთ-ერთი მნიშვნელოვანი ინსტრუმენტი,რომელიც რეკომენდებულია ყოველთვიურად, მენსტრუალური ციკლის დასრულებიდან მე-7–12 დღეზე, ხოლო მენოპაუზის პერიოდში — ყოველი თვის ერთსა და იმავე რიცხვში.

როგორ ჩავატაროთ ვიზუალური დათვალიერება:

1. დადექით სარკის წინ და გულდასმით დააკვირდით ძუძუს კანს:

   • ხომ არ აღინიშნება შეშუპება, შეჭმუხვნა ან ფერის ცვლილება?

   • შეამოწმეთ დვრილების მდგომარეობა — ჩაბრუნება, დაზიანება, გამონადენი.

2. ხელები შემოიწყვეთ კეფაზე და წინ წამოწიეთ მკერდი;

   • დააკვირდით ძუძუს სიმეტრიას, ფორმას, კანის ზედაპირს.

3. დაიხარეთ 90 გრადუსით და კვლავ დაათვალიერეთ ორივე ძუძუ სარკეში.

თვითპალპაციის ტექნიკა

თვითგასინჯვისას გამოიყენეთ ხელის სამი თითის ბალიშები (საჩვენებელი, შუა და არათითი):

• მარცხენა ხელის გასინჯვისას მარჯვენა ხელი გამოიყენეთ და პირიქით;

• ხელები მოათავსეთ კეფაზე;

• თითებით შეამოწმეთ ძუძუს შიდა და გარე ნაწილები;

• მოძრაობა იყოს წრიული, ზედაპირული და შემდეგ ღრმა;

• დაათვალიერეთ დვრილებიდან გამონადენის არსებობა (ცერა და საჩვენებელი თითით მსუბუქად დაწექით დვრილს);

რა უნდა გააკეთოს ქალმა საეჭვო სიმპტომების აღმოჩენის შემთხვევაში?

ნებისმიერი საეჭვო სიმპტომის აღმოჩენისას აუცილებელია დაუყოვნებლივ მიმართოთ:

• პირველადი ჯანდაცვის რგოლს — ოჯახის ექიმს, რომელიც უზრუნველყოფს შესაბამის სპეციალისტთან გადამისამართებას;

• სპეციალიზებულ კლინიკას ან სკრინინგ ცენტრს, სადაც შესაძლებელია სრულყოფილი გამოკვლევების ჩატარება.

სკრინინგი ჟორდანიას სამედიცინო ცენტრში

ჟორდანიას სამედიცინო ცენტრში ქალბატონებს სთავაზობენ სამსაფეხურიან სკრინინგს, რომელიც დაფუძნებულია საერთაშორისო სტანდარტებზე:

🔹 ფიზიკალური გასინჯვა (პალპაცია)🔹 ულტრაბგერითი კვლევა (ძუძუს და რეგიონული ლიმფური კვანძების)🔹 2D მამოგრაფია🔹 საჭიროების შემთხვევაში — 3D მამოგრაფია (ტომოსინთეზი) და MRI🔹 საჭიროებისამებრ — COR-ბიოფსია (მსხვილნემსიანი) ან FNA-ბიოფსია (წვრილნემსიანი)